Greinar

Mikukvøldið 29. januar vitjaði eitt mannsterkt lið úr dansifelagnum Tøkum Lætt nýggja stásiliga ellisheimið, Boðanesheimið, í Havn og undirhelt búfólkið við vísum, kvæðum dansi, og eisini vóru søgur sagdar. Ikki var neyðugt hjá nøkrum at ivast í, at búfólkini hugnaðu sær og livdu við í dansinum og kvæðunum. Jú víst livnaðu tey rættuliga upp, og nøkur teirra hættaðu sær framm á gólv og upp í ringin og dansaðu og kvóðu við, tað tey orkaðu, summi við góðum styrki frá teimum framúr fittu starvsfólkunum.

eitt Ð ov nógv

Eftir at hava smurt eina rúgvu av breyði og kókað enn fleiri egg til dansifólkið, hittust vit aftur í sjónleikarahúsinum um kvøldið, at dansa og kvøða.Vit hildu á til umleið kl. 4 , so kvøldið var gott.Nú leygarkvøldið fara vit aftur at dansa, tí Sláið Ring hevur boðið øllum dansifeløgum í sín 35 ára føðingardag.

Fyrsta nevndin í Tøkum Lætt 

Ársveitslan 2013 varð sum mong undanfarin ár hildin í kappróðrarneystinum á Argjum. Tøkum Lætt var júst vorðið 20 ár, so veitslan var eisini ein 20 ára føðingardagur. Limir úr Klaksvíkar dansifelag, Eysturoyar dansifelag og av Látrinum á Eiði vóru við sum gestir í veitsluni. Harumframt vóru borgarstjórin í Havn, Heðin Mortensen og Hjørdis, og hin fyrsta nevndin í Tøkum Lætt eisini við. Somuleiðis var eisini nevndin í Sláið Ring við sum gestir. Tilsamans mundu vera eini 200 fólk í Veitsluni.

Nú hevur fyrsta dansi kvøld hjá Tøkum Lætt verið,eitt frálíkt kvøld. Byrjað varð við barnadansinum kl 19, fyrst vóru barnarímur kvøddar. Síðan var ein søga søgd, hesu ferð kvæðið um Harra Pætur og Elinborg  við tí fyri eygað at børnini í Tøkum Lætt fara at læra seg hetta í vetur.Seinni byrjaði vaksnamannadansurin, fleiri nýggj andlit vóru at síggja og tað er at fegnast um.Byrja varð við løttum kendum kvæðum og aftaná steðgin, sum vanligt er, við einum drekkamunni og góðum heimabakaðum afturvið, skipaði Helga Hermansen Kjartan Ólavsson, eitt sera gott og ríkt kvøld!

Aðalfundurin hjá Tøkum Lætt var í Skansastovu sunnukvøldið 6. oktober. Tað vóru ikki so nógv fólk møtt á fundi hesaferð, men eini 20-25 fólk mundu tað vera. Formansfrágreiðingin fyri farna árið varð lisin upp og góðkend. Andrias stóð fyri vali sum formaður, og varð hann afturvaldur við lógvabrestum.

Leygarkvøldið 5. oktober varð dansað saman við pensionistum. Talan var um eldri fólk úr øllum landinum, ið hildu veitslu í Dansifrøi í Havn. Væl av fólki var samankomið, og úr Tøkum Lætt vóru vit eisini fleiri. Vit dansaðu eftir borðhaldið og kvóðu nakrar vísur og okkurt kvæði. Andrias skipaði Flóvin Bænadiktson og Hr. Sinclair, og Óli skipaði Leivs kvæði. Aftaná spældi eitt orkestur til dans, og mong fingu sær ein "swing om" og hugnaðu sær. 

Drekkamuður við góðari gularótskaku afturvið var at fáa, so har var eisini okkurt fyri kræsnar gómar. Eitt hugnaligt kvøld.